تجربتي مع شامبو وبلسم تريسمي نعومة الكيراتين + نصائح مفيدة جدا للشعر ال(frizzy) المتطاير | Review: TRESemmé Shampoo & Conditioner Keratin Smooth

كيف الاختبارات معاكم؟؟
اعياد ومناهج جديدة بالورق ما نبا ♥

اليوم جايبتلكم ريفيو عن شامبو تريسيمي نعومة الكيراتين

Tresemme Keratin Smooth Shampoo Review

ونصائح عن الشعر (frizzy) المتطاير/المنفوش

والي ما يعرف الريفيو هي كلمة انجليزية معناتها انه اتكلم عن المنتج من كل النواحي. ايش هوا المنتج، ايش فائدته، سلبيات، او ايجابيات، و السعر... الخ

يلا نبدأ♥♥

طبعا الشامبو مو الكيراتين هوا نفسه الغالي! لا هوا بس تركيبته فيها بعض من الكيراتين، يعني لا تتوقعي شعرك فجأة يصير كأنه مسشور

التغليف: الشامبو والبلسم يجو بعلب بلاستيكية متينة وسهلة الضغط، مرنة وممتازة، الأغطية مرة عجبتني وممتازة وسهلة الاستخدام. الشامبو يجي بعلبة حمرا والبلسم بعلبة بيضا الي يسهل عليا اني افرق بينهم بسرعة وسهولة، ومو اقعد كل مرة امسك واحد واحد واقرأ بلسم ولا شامبو. وصراحة درجة اللون الاحمر مرة عجبتني فيها اندرتون بنك او اورنج.

طبعا زي ماهو مكتوب انه يتحكم فالتطاير يعني مناسب للشعر الفرزي، غالبا الكرلي او weavy المموج.

الشعر الfrizzy غالبا للي عندهم شعر كيرلي او مموج وعباره عن انه الخصلة منفوشة وما تكون ماسكة نفسها، يكون في شعرات متطايرة حولينها. ونصيحة للتحكم بالشعر الفرزي هوا انه لا تمشطيه غير بعد الاستحمام او لمن يكون مبلبل؛ لانه راح ينفش معاكي. وطبعا افضل قبل لا تدخلي تستحمي تمشطيه وتسلكيه من كل العقد عشان تستحمي مظبوط.

اول انطباع: حسيته ينظف من القلب يعني ممكن غسلة وحدة وتكفي. بعد ما الشعر نشف حسيت انه خلى شعري -خصوصا من عند الجذور- كدا ملمسه غريب وحسيته يدبق(طبعا غسلته بالمويا كويس) وهذا كان فقط في اول وثاني مرة استعملته لكن من ناحية باقي الشعر بالعكس حسيته كويس ويمسك الخصلة الكرلي (frizzy) كويس. وبعد كذا الحمدلله ما صار يخلي الشعر يدبق.

السعر: انا اخذت الحجم الصغير بشيء وعشرين و للاحجام الثانية مناسب لكنه عادتا للجهة الغالية شوية.

زي ما قلت ينظف من القلب فحسيته ينشف الشعر شوووية فمع استخدام البلسم يسوي توازن ممتاز.

ايجابياته: انه ايوة يتحكم فالتطاير ويمسك الخصلة.

سلبياته: ممكن يخلي الشعر شوووي يدبق او ملمسه غريب عند استخدام الستريتنر (السيراميك).

طبعا فالنهاية ممكن نفع لي بس ما ينفع لك او العكس لان كل شخص شعره يختلف عن الثاني.

وفالناهية،، اعطيه 9/10 واتمنى افادكم البوست

فتحت حساب تويتر للمدونة

@belledelayan